Cantigas Medievais

No ano 2012 o coro de voces brancas Cantar Delas emprendemos o proxecto de interpretar un repertorio fundamental, e pouco coñecido, da Música Galega, como son as Cantigas Medievais.

Con esta intención empezamos a preparar un concerto cunha pequena escolma das Cantigas de Santa María de Afonso X, o sabio e das Cantigas de Amigo de Martín Codax.

Para axeitar máis aos nosos tempos a sonoridade desta música, monódica na súa orixe, solicitamos a colaboración do grupo de música tradicional Tundal, que elaboraron uns arranxos para cada unha das pezas, dándolles o carácter de música culta e popular a un tempo, como era nos séculos XIII e XIV, cando naceron estas cantigas.

Resultado desta xuntanza saíron unha serie de concertos que amosaron en diversas vilas de Lugo a gran riqueza literaria e musical da cultura galega que posuímos os galegos. Estas Cantigas destacan por ser case as únicas das que conservamos a notación musical orixinal.